BR LA UNION – Pagan-annaden ti Philippine National Police (PNP) ti publiko iti panagusar ti “tuklaw” wenno nangisit a sigarilyo a mangigubway ti panag-seizure ti maysa a tao.
Kinuna ni PNP chief General Nicolas Torre II, ipa-amiris da iti PNP Crime Laboratory, Philippine Drug Enforcement Agency (PDEA), Dangerous Drug Board ken Police Drug Enforcement Group ti nasao a “tuklaw”.
Innayon ni Torre nga adda rason nga mideklara daytoy nga iligal agsipudta delikado ken agparnuay ti disgrasya.
Addan iti inaresto da a sumagmamano nga indibidwal mainaig ti “tuklaw” ket duk-duktalen dagiti otoridad ti pagtataudan daytoy.
Maibasar iti report, adda ramen a synthetic cannabinoids iti sample ti sigarilyo a maaw-awagan ti “tuklaw” ket daytoy ti mangigubway ti panag-seizure ti maysa a tao.
Nangat-ngato pay ti nicotine content iti bulong ti mula a nicotiana rustica a maus-usar iti nasao a sigarilyo, nu ikumpara iti ordinaryo a tabako wenno nicotiana tabacum.
