LA UNION — Ballaygi a naiserbi idi malem kalman, Agosto 9, ti National Bureau of Investigation wenno NBI-Region 11 iti sabali manen a warrants of arrest kenni Kingdom of Jesus Christ leader Apollo Quiboloy ken dadduma pay nga akusado.
Iti NBI Region 11 nga indaulwan ni director Archie Albao ket simrek da iti Kingdom of Jesus Christ compound idiay Carlos P. Garcia Highway idiay Davao City agarop alas 4:00 ti malem agingga alas 5:30, tapno iserbi iti warrants of arrest nga adda pakainaiganna iti kaso a child abuse, sexual abuse, ken qualified human trafficking nga inyisyu ti korte idiay Davao City ken Pasig City.
Nupay kasta, napaay dagiti kameng ti NBI a makita ti pugante a pastor iti uneg ti KOJC compound.
Dagiti abogado ti Kingdom of Jesus Christ iti nangawat iti warrants of arrest nga inserbi ti NBI-Region 11.
Immuna ti daytoy, imbaga ni Police Brig. Gen. Nicolas Torre III, agdama a Police Regional Office (PRO)-Davao region chief, a nakaawat da ti impormasyon a mangibagbaga a ni Quiboloy ket adda laeng iti KOJC compound.
Nakalukat ti hotline da kasaruno ti anunsiyo a P10-million ti cash reward iti siasinuman a makaited ti impormasyon nu sadino ti paglem-lemmengan ni Quiboloy ken P1 million para kadagiti co-accused.
