BR LA UNION – Impasigurado ti Philippine National Police (PNP) a kaswanda dagiti pulis a karaman iti panagpukaw dagiti 34 a sabungero.
Kasaruno daytoy ti inbutaktak ti maysa a whistleblower nga adda sumagmamano nga opisyal ti pulisya ket karaman iti pannakapukaw dagiti mammallot.
Segun kenni PNP spokesperson Brig. Gen. Jean Fajardo nga ur-urayenda pay laeng ti sumagmamano a detalye ti akusado, nga iti agdama ket agap-aplikar kas state witness.
Kinunana nga impasigurado kenkuana ni PNP chief General Nicolas Torre III nga uray siasino ti karaman, sibilyan man wenno nangato ti ranggona nga opisyal ti PNP, saanda a pakawanen.
Kinunana a nakasaganada met a mangipaay iti seguridad iti potensiyal nga state witness ken makitinnulongda iti Department of Justice (DOJ) seknan iti nasao a kaso.
