BR LA UNION – Maur-uray ti kumpirmasyon manipud Palasyo ti Malakanyang nu pudno a ni Lt. Gen. Jose Melencio Nartatez Jr. ti sumukat iti puwesto kas hepe ti Philippine National Police.
Ni Nartatez ket tubo ti Santa, Ilocos Sur, nagserbi a Police Provincial Director idiay nga Ilocos Norte idi 2017, nagbalin a commander iti Police Regional Office 4-A idiay Calabarzon region ken National Capital Region Police Office idiay Metro Manila.
Daytoy ket kalpasan a naikkat iti puwesto ni Gen. Nicolas Torre III, tallo a bulan kalpasan nga inawat na ken nagsapata iti posisyon kas maika-31 a Chief of the Philippine National Police idi Hunyo 2, 2025 idiay Camp Crame, Quezon City kalpasan a nag-retiro iti serbisyo ni sigud a PNP chief Gen. Rommel Marbil.
Ti pannaka-relieve ni Gen. Torre iti puwesto ket nakailanad iti surat a napetsaan ti Agosto 25, 2025 ken pirmado ni Executive Secretary Lucas Bersamin, “by the order of the President.”
Naamwan nga epektibo a dagus ti bilin a naggapo iti Malakayang.
Ni Torre iti maika-uppat a nagserbi a Chief PNP iti sidong ni President Ferdinand Marcos Jr.
Saan a nakailanad iti nasao a surat ti rason iti pannaka-ikkat ni Torre iti posisyon.
Nagbalin a sikat ni Torre ken nagbalin pay a headlines iti dam-damag gapu iti panangidaulo na ti pannaka-arestar dagiti prominente nga indibiduwal ditoy pagilian, kas kenni Pastor Apollo Quiboloy ken ni sigud a President Rodrigo Duterte idi isuna ti Criminal Investigation and Detection Group (CIDG) Chief.
Maipalagip a ni Torre iti kaunaan a PNP Chief a naggapo iti Philippine National Police Academy, a graduate iti Class 1993.
