Nagbalin a naballigi iti naisayangkat a maritime drills ti Pilipinas ken Australia kalpasan nga awan ti napasamak nga interference wenno panakibiang ti pagilian a China.
Segun kenni Armed Forces of the Philippines Education, Training and Doctrine Commander Major General Francisco Lorezo Jr., awan ti naengkwentro da a pangta bayat ti panagdalyasat da kadagiti lugar idiay West Philippine Sea kabayatan ti Exercise Amphibious Land Operation – a maibilbilang kas kadakkelan nga iteration ti bilateral exercise iti nagbaetan ti pagilian ken Australia manipud idi 2023.
Immuna a nangiganuat iti naval forces ti Pilipinas ken Australia kadua iti Canada ti multilateral exercise iti makin-daya a paset ti Panatag Shoal idi Miyerkules – a nangipamatmat ti coordinated air defense drills ken precision formation sailing kas paset ti nalawlawa nga Exercise Alon 2025.
Dinillaw met ti defense ministry ti China iti kalkalpas laeng a maritime drills ken inakusaran iti Pilipinas a maipagarop nga agur-urnong ti impluwensya manipud kadagiti external forces a makakadadael iti seguridad ken kinatibker ti rehiyon.
Ngem iti dasig ti pagilian, iti biennial drills ket saan a maikontra wenno pangta iti aniaman a pagilian no di ket maysa a panagsagana a salakniban ken papigsaen iti kapasidad ti teritoryo.
Iti closing ceremony ti Exercise Alon, dinakamat ti AFP official nga iti nasao a drill ket tapno sanayen iti interoperatibility dagiti naval forces dagiti dua a pagilian.###
