BR LA UNION – Inimbitaran ti House Infrastructure Committee (InfraComm) da sigud a Senate Finance Committee Chairperson Grace Poe, Ako Bicol party-list Rep ken sigud nga House Appropriations panel chairperson Zaldy Co ken sigud a Department of Public Works and highways (DPWH) official Roberto Bernardo, a sumango ti imbestigasyon ti flood control projects partikular iti budget insertions.
Ti imbitasyon kadagiti sigud ken agdama a mammanday linteg ket kasaruno iti panang-aprubar ti House panel iti mosyon ni Caloocan Rep. Edgar Erice, gaputi panangikalintegan na a rumbeng nga agpalawag dagiotoy nu apay nga adda insertions wenno naisingit a pondo ti budget item iti national budget idi 2023, 2024 ken 2025, a segun kenni Erice ket agbalor ti P1 trillion nga insertions.
Immunan a kinumpirma ni House InfraComm chairperson Rep. Terry Ridon a naimbitaran ni Co tapno sumango iti flood control probe kalpasan a naamwan a naisingit iti P96 million ghost infrastructure project idiay Plaridel, Bulacan bayat ti closed-door meeting ti bicameral conference committee.
Segun iti mammanday linteg, ti nasao a proyekto ket awan iti National Expenditure Program wenno iti mismo a General Appropriations Bill wenno gakat a pondo nga inaprubaran ti Nababa a Pagpandayan Linteg ti Kongreso.
