BR LA UNION – Nalmes ken natayen idi marekobre dagiti otoridad dagiti tallo a lallaki nga agga-gayyem bayat ti panagdigos da iti kabaybayan partikular iti maysa a nalatak a beach cottage iti Barangay San Francisco, San Fernando City, La Union.
Dagiti biktima ket nabigbig nga isuda: Prexian Liqiag, agtawen ti 22, factory worker ken Joshua Dativas, 17-anyos, estudiyante, agpada a residente ti Ammocao, Barangay Bayabas, Sablan, Benguet; ken Jero Binay-an, agtawen iti 37, maysa factory worker, residente ti Poblacion, Sablan, Benguet.
Napasamak ti insidente, maysa nga aldaw kalpasan ti panagduprak ti bagyo Paolo.
Nagresponde dagiti kameng ti City of San Fernando Police Statio iti report a drowning incident, agarop alas 3:30 ti malem idi Oktubre 5, 2025.
Iti oras ti alas 3:50 ti malem, narekobre ti lifeless body ni Prexian.
Ngem iti bagi dagiti dua pay a lallaki ket narekobre kabigatanna, iti nasao met laeng a kabaybayan.
Alas 7:30 ti bigat idi October 6, narekobre iti bagi ti menor de edad a ni Joshua ken iti oras alas 4:55 ti malem idi October 6, narekobre ti naudi a bangkay, Binay-an.
Iti search and rescue operation ket nagbinnuligan ti Phil. Coast Guard (PCG), La Union Maritime Police Station, City of San Fernando PS ken Provincial Disaster Risk Reduction and Management Office ( PDRRMO).
