BR LA UNION – Pinatalgedan ni Julie Ann H. Sias, Officer-in-charge ti City Disaster Risk Reduction and Management Office nga awan ti aniaman a nailista a perdisyon ditoy siyudad ti San Fernando kasaruno ti magnitude 4.4 a ginggined idiay ili ti Pugo, agarop alas 10:30 itay agsapa.
Segun kenni Sias, dagus da a nagpatulod ti ballaag kadagiti coastal barangay para iti posible nga epekto ti gingined iti dalluyon iti kabaybayan .
Binagaan da pay dagiti maseknan nga opisyal ti barangay agraman dagiti residente a dagus nga i-report iti opisina da nu adda dagiti ‘untoward incidents.’
Nangisayangkat metten iti assessment ti City Engineering Department kadagiti pasdek ken dadduma pay nga imprastraktura ditoy ciudad.
Maipalagip a sakbay pay iti ginggined ket masansan iti panangiyuswat ti lokal a gobiyerno ditoy La Union kadagiti earthquake drills isu nga agtalek ni Sias a nakasagana iti probinsya para iti pangta ti ginggined.
Kinunana na nga addaan da kadagiti naidatag a plano ken arwaten a pangsalakan kadagiti kanito iti emerhensiya.
Impaganetget na iti panangiyuswat ti “duck, cover, and hold” ken agbalin a nasipot kadagiti posible a makadangran iti bagbagi.
Nu kabaelan iti rumuar ti pasdek ket ikagumaan ken agbiruk iti lugar a natalged agingga agsardeng iti panagdayeg.
