BR LA UNION – Nagpanawagan iti Akbayan Party, Tindig Pilipinas, ken dadduma pay a grupo idiay Office of the Ombudsman a dagus nga imbestigaran ni Vice President Sara Duterte iti maipagarop a biddut a panangbusbos ti confidential and intelligence funds (CIF) ken nakaru a panag-abuso iti bileg.
Iti surat nga insumite da idi kalman (Lunes), impaganetget da a ti panangusar ti CIF tapno imbestigaran ti maipagarop a “korapsyon” ket maysa a panangallilaw wenno palusot tapno kalluban iti misuse ti pondo.
Segun kenni Akbayan President Rafaela David, rumbeng nga iti korte nga agpalawag ni VP Sara ken saan a rumbeng a liklikan ti inaramid na a panaglabsing.
Binabalaw pay ni David iti gandat a panangusar ni Duterte iti pungtot ti publiko, iti korapsyon para iti bukod na nga interes.
Impaganetget ni David a marurod ti amin kadagiti kurakot a pakairamanan ni VP Sara isunga kayat da nga agsungbat daytoy gaputi maipagarop a biddut a pananggastos na ti CIF.
Innayon pay ni Akbayan Youth Chair Justine Balane, a saan a “safe” ni VP Sara agsipudta singiren isuna dagiti agtutubo.
Inallokoy dagiti grupo iti Ombudsman nga aggaraw a patas ken paneknekan nga awan ti opisyal uray bise presidente ti naglabsing iti linteg.
