BR LA UNION – Ballaygi ti insayangkat a buy-bust operation dagiti anti-illegal drugs operatives idiay Barangay Ortiz, Naguilian, La Union itay agsapa, October 22, 2025 kalpasan a naarestar iti Top 1 provincial target iti listaan ti PDEA La Union Provincial Office.
Ti suspek ket nabigbig kas 50-anyos, awanan ti trabaho, maibilang a high value individual (HVI) iti illegal drug trade, ken residente ti Barangay Gusing Sur, Naguilian, La Union.
Nakumpiskar iti operasyon iti innem (6) a heat-sealed transparent plastic sachets ti maatap a shabu, agdagsen ti nasurok kumurang a 5.5 a gramo, addaan ti standard drug price a ₱37,400 ken dadduma pay a non-drug items.
Naipatungpal ti operasyon babaen iti panag-binnulig ti Naguilian Municipal Police Station, Philippine Drug Enforcement Agency–La Union Provincial Office, RIU-PIT, LUPIU, RDEU, ken LUPDEU.
