BR LA UNION – Nainget nga ipatungpal ti Sto Tomas Police Station idiay Sto Tomas, La Union dagiti allagaden a napagnunumwan da iti lokal a gobyerno, maseknan nga opisina ken konseho, ken non-government organization, para iti naannayas nga obserbasyon iti UNDAS inton Nobyembre uno, 2025.
Iti pannakiuman ti Bombo Radyo La Union kenni Police Major Rez Gerome Cachin, agdama a chief of police ti nasao nga ili, kinuna na a napagnunumwan da kadagiti maseknan a lokal nga opisyal ti ili, barangay, ken sumagmamano a grupo, nga agtitinnulong da a mangipatungpal kadagiti wagas wenno pamay-an tapno pagbalinen a naurnos iti taray ti trapiko ken nawaya nga agturong ti tattao iti kamposanto, isunga maipatungpal ti re-routing.
Inyanunsiyo pay ni Cachin nga ipatungpal da ti 6:00 pm a closing time iti sementeryo wenno agpatingga laeng iti alas 6:00 ti rabii nga agtalinaed dagiti umili inton Nobyembre uno.
Kinuna pay ni Cachin nga agingga laengen inton bigat, Oktubre 31, a mabalin nga agitugot kadagiti natirad a banag nga usaren iti panagdalus iti uneg ti kamposanto.
Kinuna na nga inton Sabado, Nobyembre uno, saanen a maipalubos dagiti natirad wenno natadem a banag a maiserrek iti sementeryo, agraman iti arak, arwaten a pangsugal, speakers, ken tagilako.
Inbalakad ni Major Cachin kadagiti umili a saan koma nga aggi-giddan nga agturong iti kamposanto, siguradwen nga adda mabati a tao iti balay, tapno saan a maikkan ti gundaway dagiti dakes nga elemento a sumrek ken agtakaw iti uneg ti balay.
Addaan ti 50 a personnel ken augmentation force ti Sto Tomas Police Station a mangimando iti trapiko, urnos ken kapya kadagiti tallo a sementeryo ti nasao nga ili malaksid laeng dagiti 100 a puwersa ken volunteers manipud iti Municipal Disaster Risk Reduction and Management Office (MDRRMO).
