BR LA UNION – Sinuspinde ti Palasyo ti Malakanyang iti serrek ti gobyerno ken klase iti amin a lebel inton bigat, Nobyembre 10, 2025 gaputi pangta ken delikado nga epekto ti Supertyphoon Uwan.
Inruar ti Malacañang ti Memorandum Circular No. 106 a mangsupinde ti amin a klase iti amin a tukad ken trabaho iti gobyerno gaputi epekto ti super typhoon Uwan.
Daytoy ket maibasar iti rekomendasyon ti National Disaster Risk Reduction Management Council (NDRRMC).
Maibasar iti Memorandum Circular a pinirmaan ni Executive Secretary Lucas Bersamin, dagiti awan ti serrek na iti trabaho ken klase inton bigat ket idiay National Capital Region, Cordillera Administrative Region, Regions 1,2,3, 4-A,4-B ken Region 7.
Suspendido pay ti klase iti amin a tukad kadagiti nadakamat a rehiyon, agraman Region VI, Region VII, ken Negros Island Region inton Nobyembre 10 ken 11, 2025.
Impaganetget ti Malakanyang a tuloy ti trabaho dagiti government offices a responsable iti panangipaay ti basic services.
Inlawlawag ti Palasyo a mabalin nga agdeklara ti suspension of work and classes dagiti local chief executives iti masakopan da a lugar.
Bayat a ti suspension of work iti private companies ket disrection dagiti mangidadaulo.
Kabayatanna, nangirwar ti abiso iti House of Representatives a suspendido ti trabaho da idiay Kamara inton bigat gaputi Super Typhoon Uwan.
