BR LA UNION – Impaganetget ni Ombudsman Jesus Crispin Remulla a saan na a nalipatan iti immuna a waragawag seknan iti plano nga imbestigaran dagiti isyu nga adda pakainaigan na kenni VP Sara Duterte.
Iti maysa nga exclusive interview ti Bombo Radyo, kinuna ni Remulla a nakasentro pay laeng ti atensyon da iti isyu ti flood control scandal, ngem mabalin nga iti sumarsaruno a gundaway ket subliyanan da iti dadduma pay nga isyu.
Segun kenkuana, saan a kayat ti Ombudsman nga agsayang ti oras, nangruna ket impeachable officer ni VP Sara, isunga nasay-sayaat nga iti impeachment court nga adalen ti reklamo kontra iti bise presidente.
Dinakamat na iti dua a practical solutions iti isyu kenni VP Sara, imbestigaran manen ti kongreso ken dut-duten ti impeachment case manipud iti archive.
Kinuna na nga agtaltalinaed ti commitment ti anti-graft body nga amin nga adda pakainaigan da iti kinakusit ket mabalin a maimbestigaran.
