Naitabonen ni sigud a Chief Presidential Legal Counsel Juan Ponce Enrile iti Libingan ng mga Bayani idiay Taguig City, idi kalman, Nobiembre 22, 2025 .
Nabalkot iti lungonna ti bandera ti Pilipinas ken naipaayan ti departure honors ti Armed Forces of the Philippines (AFP) sakbay a naisayangkat iti funeral march manipud heroes’ gate.
Naaddaan ti maudi a bendision nga indauluan ni Reverend Father Cherish Chester Serana sakbay a naiserra iti tanemna.
Nangipeksa ti panangkontra dagiti sumagmamano a grupo kas ti National Union of Peoples’ Lawyer iti panangitabon kenni Enrile iti nasao a sementerio, gapo ta maysa daytoy a “grave distortion of history” iti nagbalin a papel ni Enrile iti panangipatungpal ti Martial Law.
Ikonsiderarda iti Libingan ng mga Bayani a saan a rumbeng nga agbalin kas “santuario” para kadagiti tattao a nangdadael iti demokrasia.
Iti laksid ti kontrobersia, agtaltalinaed nga historikal iti panangitabon kenni Enrile kas maysa kadagiti historikal a personalidad a nagbalin nga paset ti EDSA People Power Revolution.#
