BR LA UNION – Impaganetget ni Chief Presidential Legal Counsel Juan Ponce Enrile a ti karbengan iti nawaya a panagirakurak ket nakabase iti pudno nga impormasyon, nga addaan tarigagay a mangipaay ti umno a pannaka-ammo iti publiko a saan ketdi a tapno manipulaen dagitoy.
Iti waragawag ni Enrile ket adda pakainaiganna iti isyu seknan iti panagsaknap ti fake news online iti panawen ti eleksiyon, a maysa kadagiti kangrunaan a tinalantan iti nababa a pagpandayan linteg ti Kongreso.
Imbinglay ni Enrile iti maysa a post iti social media ita nga aldaw ti Domingo, Marso 23, a ti nawaya a panagirakurak iti social media ket rumbeng a nakabase iti pudno tapno masiguro a magun-od ti publiko iti umiso nga impormasyon.
Inlawlawag na pay a ti Bill of Rights ket mangipapaay ti karbengan dagiti tattao tapno maka-aramid ti umno a desisyon seknan kadagiti isyu a makaapektar kadakuada, saan ketdi a tapno allilawen wenno i-manipula dagitoy para iti kabuk-bukodan nga interes .
Innayon na pay a nasken nga agbalin a naannad dagiti agus-usar ti social media iti panangibinglay ti impormasyon online tapno maliklikan a maiwaras dagiti biddut nga impormasyon a mabalin a mangigubway ti riribok iti pagilian.
Kinuna pay ni Enrile a saan a rumbeng nga ibilang dagiti social media users iti platform da a lisensya tapno agiwaras ti peke nga impormasyon, agsipudta mangigubway daytoy ti ”anarchic information system and disorderly society.”
