BR LA UNION – Naisayangkat iti media and security engagement idi kalman, Agosto 27, 2026 iti Philippine Information Agency (PIA) Regional Office 1 ditoy siyudad ti San Fernando, La Union tapno kitaen ti kasasaad dagiti kameng ti media ken papigsaen ti koordinasyon iti baetan ti law enforcement ken local press ditoy La Union.
Ti nasao nga engagement ket indaulwan ni Usec. Jose “Joe” Torres Jr., Executive Director ti Presidential Task Force on Media Security (PTFoMS).
Naisayangkat ti aktibidad, maiyannurot iti direktiba ni PGEN Jose Melencio C. Nartatez Jr., hepe ti Philippine National Police (PNP), kas paset iti agtultuloy a panangikagumaan ti PNP ken PTFoMS a mapapigsa dagiti addang para iti seguridad, proteksyon, ken pagimbagan dagiti kameng ti media ken media practitioners.
Iti nasao a panagtaripnong, natalantan dagiti kauddian nga update seknan iti kaso a pakairam-ramanan dagiti media practitioner, ken dadduma pay nga isyu nga adda pakainaiganna iti kinatalged dagitoy, bayat ti panangipatungpal ti pagrebbengan iti panangidanon ti impormasyon iti publiko.
Impaganetget na iti kinapateg iti lalo pay a panangpa-pigsa ti koordinasyon ken kooperasyon iti baetan ti Police Regional Office 1 (PRO 1) ken PTFoMS, partikular iti panangibinglay ti impormasyon, panagmonitor kadagiti insidente, ken dagus a panangsungbat dagiti pangta a mabalin a makaapektar iti seguridad dagiti media practitioner ditoy La Union ken dadduma pay a paset a ti rehiyon.
Kabayatanna, adda iti uppat a kaso ti media killings iti Region 1 sipud 1986 agingga ita, ngem maysa laeng a kaso ti adda pakainaiganna iti trabaho.
Segun kenni Torres, dagiti kangrunaan ita a pangta iti media ket dagiti insidente a mapaspasamak iti online, pakairamanan ti panangriribuk, pangta ken panangraut ti kredibilidad ti maysa a journalist.
Dagiti dadduma pay a karit a sangsangwen dagiti accredited journalists a mangdadael ti kredibilidad dagitoy ket dagiti agiwar-waras iti fake news ken panang-atakar kadagiti babbai a journalist, nangruna no i-report dagiti sensitibo ken kontrobersiyal nga isyu.
Innayon ni Torres a nairekord ti Pilipinas iti panagngato ti press freedom rankings iti napalabas a 21 a tawen, ngem agtalinaed a napateg ti agtultuloy a panangitandudo ken panangsalaknib iti press freedom.
