BR LA UNION – Nangiruar ti arrest warrant iti South Bangkok Criminal Court kontra kenni Anne Jakrajutatip, sigud a co-owner ti Miss Universe, kalpasan a saan a dimmar-ay iti nakatuding a pannakaibasa ti kaso na a 30 million baht fraud.
Segun ti korte, awan ti impaay a palawag ti kampo ni Jakrajutatip, isunga mapapati a linisyan na iti proseso ti linteg.
Nakaswan ni Anne ken iti JKN Global Group gaputi maipagarop a panangalllaw tapno maallokoy ti maysa a doktor nga ag-invest iti corporate bonds a maipagarop a saan met gayam a kabaelan a bayadan ti kumpanya.
Gapu ti saanna a panagdar-ay, immandar ti korte nga ibabawi ti piyansa ni Jakrajutatip ken nangituding ti baro a petsa para iti verdict hearing inton Disyembre 26, 2025.
Kabayatanna, rimwar iti report a maipagarop a naglibasen iti nasao a pagilian ken nagturong idiay Mexico ni Jakrajutatip tapno panawan dagiti obligasyon ti JKN.
Pinaglibakan met ti JKN Global dagiti akusasyon a panangallilaw ken impaganetget da a ti problema nga utang ti kumpanya ket gapwanan ti kimmapoy nga ekonomiya ti pagilian ken isyu iti cash flow.
Maipalagip a ni Anne ket nagbalin a sentro ti atensyon ti publiko kalpasan a ginatang na ti Miss Universe Organization idi 2023, ngem naglosolos kas CEO idi Hunyo bayat a sumangsango ti kompanya iti reorganization ken legal issues.
