BR LA UNION – Napunas amin a bannog ken nasukatan ti ragsak ken gin-awa dagiti napasaran a pressure ken challenge iti napalabas nga innem a bulan a panagsagana para iti eksaminasyon.
Dayta iti ladawan a marikrikna ita ni Sofia Zoe Villanueva Delfin kalpasan a maysa kadagiti pimmasa iti November 2025 Nurses Licensure Examination a naisayangkat idi Nobyembre 4 ken 5, 2025 idiay Baguio City.
Ni Delfin ket tubo ti Barangay Casiaman, Bacnotan, La Union ken nagturpos ti Bachelor of Science in Nursing idiay Don Mariano Marcos Memorial State University – South La Union Campus ita a tawen ken naitandudo pay a Mutia ti Bacnotan idi 2024.
Iti eksklusibo a pannakiuman ti Bombo Radyo La Union kenni Delfin, impaganetget na ti kinapateg ti kinasagana iti mental, physical, ken spiritual capacity sakbay ti eksaminasyon.
Malaksid dayta, dinakamat na pay dagiti kangrunaan saguday ti maysa a nurse tapno maaramid a nasayaat ti pagrebbengan ken trabaho.
Binalakadanna pay dagiti sumarsaruno a board takers nga agtalek iti kabaelan ken agbalin a natibker kadagiti karit ken pannubok iti dalan, tapno makagun-od iti tar-tarigagayan.
Plano ita ni Delfin nga aginana ti apagbiit ngem kalpasanna, nakasagana daytoy a mangawat ti amin nga oportunidad para iti trabaho ngem prayoridad na a pagserbian nga umuna dagiti taga La Union.
Saan met a nalipatan ni Delfin a pagyamanan ti amin a nangsuporta kenkuana, sipud rugi agingga a nalpas ti journey na iti kurso a nursing, manipud iti pamilya na, gagayyem, boyfriend, alma mater, lecturers, ken kangrunaan kenni Lord a nangted kenkuana ti wisdom.
Kabayatanna, pinaregta ni Delfin dagiti saan a napagasatan iti eksaminasyon a saan a mapukawan ti namnama ket ituloy laeng kunana ti lumaban babaen iti panag-eksam agingga a makita ti nagan iti listaan dagiti pimmasa.
Maibasar iti anunsiyo ti Professional Regulations Commission (PRC), pakabuklan a 40,692 dagiti pimmasa manipud iti pakabuklan a 45,192 board takers.
