BR LA UNION – Pinasingkedan ti Philippine Consulate General idiay Hong Kong a maysa nga Overseas Filipino worker (OFW) ti natay iti napasamak nga uram idiay Tai Po District idiay Hong Kong idi Nobyembre 26.
Saan metten a nainaganan ti biktima ngem nailadawan a nagturong idiay Hong Kong para iti nasaysayaat nga oportunidad ken masuportaran ti pamilyana.
Nangidanon ti pannaki-simpatiya ti konsulada ken impadamagna a 84 a Pilipino ti addan a natalged ken accounted, maysa (1) ti nadunor idinto a pito (7) pay ti maber-beripika.
Personal a sinarungkaran ni Migrant Workers Secretary Hans Leo Cacdac iti pamilya ti pimmusay ken indanon na ti pannaki-pagladingit ni Presidente Ferdinand Marcos Jr. iti naulila a pamilya ti natay nga OFW.
Impanamnama ti sekretaryo ti mangipaay ti tulong ti gobierno iti pamilya, pakairamanan ti 10-anyos nga anak ti OFW nga agar-arapaap nga agbalin a bombero tapno awanen ti sabali a matay iti uram.
Kabayatanna, impadamag ti Overseas Workers Welfare Administration (OWWA) a kritikal ngem addan ti natalged a kasasaad ni Filipina Rhodora Alcaraz kalpasan a nasugatan bayat ti panangispalna iti 3-bulan a maladaga iti baet ti dakkel nga apoy ken napuskol nga asok.
Naawagan isuna a baro a bannuar. Agtultuloy ti panangmonitor ti OWWA, DMW, ken konsulada ken impanamnamada ti tulong ti pamilyada ditoy Pilipinas.
