Inbutaktak ni Ombudsman Jesus Cripin Remulla nga adda pay iti maipagarop a dua a dadakkel a personalidad wenno iti aw-awagan na a “Bigfish” a nakasaganan a kasuan ti ahensya gapo iti isyu ti korapsyon kadagiti flood control projects.
Inbinglay na iti maysa a pannakiumman idi kalman a maysa kadagiti dakdakamaten na a nakasaganan a makasuan ket maysa a senador. Nangipatulod pay isunan ti surat kenni Senate President Tito Sotto tapno pawilan iti daytoy a “senador” a makaruar iti pagilian.
Kenuna met ni Sotto awan pay iti naawatna a surat manipud iti Ombudsman, ken kenuna a saan a kasapulan nga mangala ti maysa a travel authority iti maysa a senador no daytoy ket personal a panagbiahe.
Innayon na pay nga iti sidong ti Senate Policy Order No.2016-003 series of 2016 nga opisyal laeng a panagbiyahe iti kasapolan nga aprobaran ti Senate President, ngem kenuna met ni Remulla, kas maysa a senador nakasurrender iti karbengan da nga agbiyahe, personal man wenno official travel.
Ado pay a kaso iti ipaulog ti Office of the Ombudsman ken namnamaen a mairuar dagiti arrest warrants mainaig iti maanomalya a flood control projects sakbay a malpas iti tawen.
Under surveillance metten ti kontratista a ni Sarah Discaya ken dagiti dadduma pay a sumangsango iti kaso a graft ken malversation gapo kadagiti maanomalya a proyekto idiay Davao Occidental.#
