Imbitaran ti Senate Blue Ribbon Committee ni sigud a Department of Education Undersecretary Trygve Olaivar, segun kenni Committee chairman Sen. Panfilo Lacson.
Kenunana, siguden a naimbitaran ti Senado ni Olaivar sakbay pay a nalpas iti panagdengngeg iti nangato a komite.
No saan a sumango iti sigud a DepEd official ket patuludan da daytoy ti subpoena ken no saan manen a tumabuno daytoy ket mabalin isuna nga i-contempt ti Senado.
Segun kenni Lacson, adu nga impormasyon iti mabalin a maibinglay ken maipaay ni Olaivar iti agtultuloy nga imbestigasyon ti komite karaman dagiti posible a koneksyon na kadagiti sumagmamano a mamanday-linteg, ken kadagiti sigud ken agdama nga opisyal ti Department of Public Works and Highways.
Immuna nga inakusaran ni sigud a DPWH Usec. Roberto Bernardo ni Olaivar nga immawat ti 15% commitment manipud iti P2.85 billion a balor dagiti proyekto.
Kaaduan kadagiti nasao a proyekto ket dagiti flood control projects bayat a dagiti sabali met ket dagiti road maintenance projects idiay probinsiya ti Bulacan.
Kasaruno ti panakairaman na iti naibutaktak nga anomalya ket naglosolos daytoy iti pwesto.
Immuna metten nga inlibak ni Olaivar dagiti nasao nga alegasyon ken kenuna a silulukat isuna iti aniaman nga imbestigasyon.#
