Ituloy ti maisingsingasing nga Independent People’s Commission (IPC) iti imbestigasion kadagiti maanomalya a proyekto iti kanito a marakrak iti Independent Commission for Infrastructure (ICI).
Daytoy iti kenuna ni Senate President Vicente Sotto III kalpasan nga imbaga ni Ombudsman Jesus Crispin “Boying” Remulla a mamati isuna nga adda ti maysa agingga dua bulan laengen iti ICI sakbay a maipasa iti opisinana dagiti maim-imbestigaran a kaso.
Segun ti senador, addan iti maikadua a panagbasa ti Senado iti singasing nga IPC a posible a mangituloy kadagiti imbestigasion ti ICI.
Inlawlawag na nga agduma iti mandato ken bileg ti ICI iti ilunglungalong na nga IPC.
Ti ICI ket naputar babaen ti executive branch tapno agkalap ti impormasion ken mangisayangkat ti imbestigasion.
Saan met a rumbeng a pangnamnamaan a mangipila ti kaso gapo ta awanan daytoy ti prosecutorial powers, subpoena authority, wenno bileg nga ag-contempt.
Bayat nga iti IPC ket maaddaan ti prosecutorial power, power of subpoena ken contempt, ken nalawlawa iti sakop na a saan laeng a limitado kadagiti infrastructure no di ket kadagiti amin a klase ti korapsion.
Inrekomenda met ni Sotto nga pagbalinen a pito a miembro iti komision, karamen dagiti mangibagi ti DOJ ken Ombudsman tapno agbalin a direkta iti proseso ti panangiggem ti kaso.
Target na pay nga iti mangidaulo ti IPC ket maysa a sigud a Chief Justice, nupay agtaltalinaed nga iti Presidente ti pumili dagiti miembro.#
