BR LA UNION – Impangato ti House of Representatives ti pondo para iti sektor ti agrikultura iti ₱292.9 bilyon iti House version ti 2026 General Appropriations Bill (GAB) nga addaan tarigagay a papigsaen iti suporta dagiti mannalon ken mangngalap, padur-asaen ti imprastraktura iti probinsiya ken palawaen ti kabarwanan a teknolohiya iti panagtalon.
Segun kenni House Appropriations Chairperson Rep. Mikaela Angela Suansing, ninayunan ti kamara ti ₱53.8 bilyon iti agriculture cluster kas paset iti panangtutok ti food security ken rural development.
Kabilang ti nainayun a pondo ket ti ₱10 bilyon para iti Presidential Assistance for Farmers and Fisherfolk a manamnama a paka-benipisyaran ti nasurok-kumurang a 1.43 milyon a mannalon ken mangngalap, ken ₱35.5 bilyon para iti farm-to-market roads ken irrigation, wenno pakabuklan a ₱74.5 bilyon para iti Department of Agriculture.
Nangilatang pay ti kamara ti ₱30 bilyon iti sidong ti Rice Competitiveness Enhancement Fund para iti farm mechanization, ₱1 bilyon para iti crop insurance, ₱2.4 bilyon para iti deep-water ports, ken ₱200 milyon para iti panangipatungpal ti New Agrarian Emancipation Act.
Kinuna ti Kamara a nairanta dagiti nasao a pondo a maibaba ti gastos iti produksyon, ingato ti apit ken mapastrekan dagiti mannalon ken papigsaen ti sektor ti agrikultura bayat nga agtultuloy iti bicameral deliberations iti 2026 budget.
