BR LA UNION – Pimmusayen ni Antipolo City 2nd District Rep. Romeo Acop.
Daytoy ti kinumpirma ni Deputy Speaker Ronaldo Puno, a longtime friend ni Acop.
Kinuna ni Puno, ti ipupusay ni Acop ket pakaldaangan unay ti Kongreso ken intero a pagilian.
Iti mensahe nga impatulod ni Rep. Puno iti Bombo Radyo, ni Acop ket naipasidong iti kidney transplant idi Nobyembre 28 ken nagbalin a nasayaat ti kondisyon na kalpasan ti operasyon.
Agpapa-imbag laengen ken makabangon metten, isunga nagbalin a positibo dagiti kakadwa na ken ninamnama da a makasubli iti trabaho iti kabiitan a panawen.
Nupay kasta, kellaat nga inatake iti puso ni Rep. Acop a nakaigapwan ti ipupusay na.
Imbinglay ni Deputy Speaker Puno a nasurok 25 a tawen a nakadwa ken nakatrabaho na ni Acop, ken inladawanna kas maysa a napudno, natured, ken addaan dignidad a public servant kadagiti umili a Pilipino.
Innayon na pay a dakkel a pukaw para iti Kongreso ken iti pagilian ti ipupusay ni Rep. Acop, nangruna iti tengnga ti agtultuloy a panagserbisyo ken dagiti adbokasiya da para iti kinaurnos ken pagimbagan dagiti umili.
