Agtaltalinaed a naulimek ni Bise Presidente Sara Duterte iti waragawag ni DILG Secretary Jonvic Remulla a maipagarop a bimmisita isuna kenni sigud a Negros Oriental Representative Arnolfo “Arnie” Teves Jr. iti maysa a pagbaludan idiay Taguig City.
Kinuna ni VP Sara iti panagdar-ay na idiay Davao City a makaammo da iti kayatda nga ibaga ken inpaganetget a saan na nga amammo ni Ramil Madriaga.
Pinili na a saan a kumpirmaen ken saan met a paglibakan dagiti akusasion mainaig kenkuana ken ni Teves – a maitudtudo kas mastermind iti panangpapatay kenni Governor Roel Degamo.
Inulit ni Duterte nga awan ti koneksion na kenni Madriaga, maysa a sigud nga aide a nangakusar kadagiti drug dealers ken POGO a mangponpondo iti kampanya na nga “Inday Sara Duterte is My President.”
Panggep met iti saritaan nga impeachment, inbatad ti Bise Presidente a nabannogen dagiti tattao kadagiti awan pagbasaran da a reklamo kontra kenkuana.
Innayon na pay a kasapulan a mapirmaan iti 2026 national budget sakbay a malpas iti tawen tapno maliklikan iti reenacted budget.
