BR LA UNION – Kinumpirma ni Philippine National Police (PNP) Public Information Office Chief P/BGen. Randulf Tuaño, a maysa a babai ti natay gaputi indiscriminate firing agarop alas 12:50 ti parbangon idi Huwebes, Disyembre 25, 2025 idiay Tondo, Manila.
Nabigbig ti biktima iti nagan a Rey-an Policarpio.
Napasamak ti insidente bayat ti panaginom ti nasanger ti grupo ti biktima ken boyfriendna a binisita na idiay Laurel Street, Barangay 120, Tondo, Manila.
Maibasar iti naala a CCTV footage, madama ti dringking spree ti grupo idi nagtataray dagitoy gaputi nagsasaruno a putok ti paltog.
Makita iti video a tumar-taray ti biktima idi kellaat a naglusdoy wenno nag-collapse.
Nabigbigen ti suspek a nagpaputok ti paltog ngem agtaltalinaed nga at-large.
Nakarekobre dagiti otoridad iti crime scene ti 9mm caliber pistol.
Umaboten ti pakabuklan a pito nga indibiduwal iti intero a pagilian ti inarestar dagiti otoridad gaputi indiscriminate firing, manipud December 16 agingga December 26, 2025, a pakairamanan dagiti uppat a police officers.
Maibasar iti allagaden, dagiti station commanders ket ma-relieve iti puwesto iti sidong ti “one-strike policy” nu iti kaso ti indiscriminate firing iti masakopan da nga area ket saan a masolbar iti uneg ti 36 nga oras.
