Dumanon ti 112 dagiti kaso ti pannakadangran gapu ti palibang manipud Disiembre 21 agingga Disiembre 28, 2025.
Segun ti Department of Health, nababbaba daytoy a bilang ti 26% maiyarig iti kapada a panawen idi napalabas a tawen – maysa a pagilasinan ti epektibo a kampanya kontra paputok.
Kaadduan kadagiti kaso ket manipud National Capital Region, sinaruno ti Ilocos Region, Central Luzon, ken Western Visayas a buklen dagiti ubbing a lalaki nga agtawen ti lima agingga katorse nga agar-aramat kadagiti palibang kas ti Piccolo, Kwitis, ken 5-Star.
Malaksid iti paputok, nailista pay dagiti 376 nga aksidente iti kalsada ken 190 a kaso ti noncommunicable diseases kas iti stroke, heart attack, ken asthma.
Kadawyan a makaptan ti stroke ken heart attack dagiti lallaki bayat nga asthma kadagiti babbai.
Agtultuloy nga agpanpanawagan ti ahensia iti publiko a liklikan iti panagusar ti delikado ken napeggad a palibang ken pilyen iti natalged nga alternatibo tapno maliklikan iti pannakadangran ita a Baro a Tawen.#
