Rumrumuar kadagiti forensic findings a posible a boluntario a naigalis ken saan a naiduron ni sigud a Department of Public Works and Highways (DPWH) Undersecretary Maria Catalina Cabral iti kawatiwatan ti Kennon Road idiay Tuba, Benguet.
Segun kenni PNP Forensic Group Officer-in-Charge Colonel Pierre Paul Carpio, awan ti ebidensia a mangitudo nga adda ti nangiduron kenni Cabral.
Maibasar iti 3D scanning technology tapno ma-reconstruct iti lugar ti insidente, impakita ti scan nga agarup 16.9 meters wenno katupag ti innem agingga siam a kadsaaran iti kauneg ti bakras manipud iti kalsada.
Agarup 0.2 a metro laeng iti kaadayo ti bangkay manipud iti sakaanan ti bakras, maysa a pagilasinan a no adda ti nangiduron kenkuana ket adayo kuma iti nakatinnagan-na.
Nakitaan met ti gasgas iti ima ken likod ni Cabral, indikasion a posible a nagpagalis isuna.
Immunan a pinasingkedan ti autopsy nga iti rason ti pannakatay ni Cabral ket blunt traumatic injuries gapu ti pannakatnag, ken mapatta-patta a napasamak iti nagbaetan ti alas-tres ken alas-singko ti malem idi Disiembre 18.
Agparparang pay iti toxicology nga umin-inom ni Cabral ti Citalopram, maysa nga antidepressant a mabalin a mangigubuay ti panagtuglep ken mabalin a makaapektar iti panagdesision.
Nupay maur-uray pay laeng iti DNA samples dagiti kabagian ti sigud nga opisial ket kenunan ti PNP a kumpirmado iti pakabigbigan ni Cabral babaen ti fingerprint match iti record ti NBI.
Agtultuloy iti imbestigasion bayat a saan pay a nasukimat iti cellphone ti sigud nga opisial.###
