BR LA UNION – Naan-anayen a linteg kalpasan a pirmaan ni President Ferdinand Marcos Jr. iti P6.793-trillion national budget para ita a tawen 2026.
Naisayangkat ti seremonya ita a bigat ti Lunes, Enero 5, 2026 idiay Ceremonial Hall ti Malacañang Palace.
Inatendaran daytoy ni Senate President Vicente Sotto III, House Speaker Faustino Dy III, Executive Secretary Ralph Recto, ken dadduma pay a mammanday linteg ken opisyal ti gobyerno.
Maipalagip nga inaprubaran ken pinirmaan ti Bicameral Conference Committee iti General Appropriations Bill (GAB) idi Disyembre 28, 2025.
Rinatipikaran ti Senado ken Kamara iti bicam report idi Disyembre 29 ken nai-transmit iti Office of the President iti dayta met laeng nga aldaw.
Iti umuna a gundaway, nailukat iti publiko ti bicam deliberations babaen ti livestream.
Nairanta daytoy tapno malikikan dagiti anomalya ken maisubli ti talek dagiti umili iti proseso ti budget.
Daytoy iti kadakkelan a badyet iti pakasaritaan ti pagilian, iti tarigagay a mapondoan dagiti kangrunaan a programa iti imprastruktura, edukasyon, salun-at ken serbisyo para kadagiti umili.
