Dumanon ti 63 dagiti nailista a kaso ti “Super Flu” iti pagilian, maibasar iti kaudian a datos manipud ti Department of Health (DOH).
Segun kenni Health Spokesperson Albert Domingo, nairekord daytoy a datos idi Disiembre.
Ti ‘super flu’ ket maysa a variant ti influenza A wenno trangkaso, ken saan daytoyen a baro a sakit.
Inlawlawag pay ni Domingo, dagiti sintomas ti super flu ket saan a naiduma kadagiti gagangay a sintomas kas iti panaguyek, panateng, gurigor, ken panagsakit ti bagbagi.
Masansan met a ngumato iti bilang ti kaso dagiti respiratory infections kadagitoy a panawen gapu iti panagbalbaliw ti paniempo.
Ita a bulan ti Enero, adda pay laeng ti dakkel a posibilidad iti panagbalbaliw ti panawen, isu a posible met a maaddaan ti iritasion iti agong ken karabukob iti publiko.
Kabayatanna, pinaregta ti DOH iti publiko nga agsuot ti face mask kas proteksion.###
