BR LA UNION – Kinumpirma ni Department of Health (DOH) Spokesperson Undersecretary Albert Domingo nga adda 38 a Pilipino a crew members a nakalugan iti MV Hondius.
Daytoy ket maysa a cruise ship a mapapati nga addaan ti hantavirus outbreak a nakatayan ti tallo a tattao.
Nakasanglad ita ti cruise ship idiay Cabo Verde idiay Atlantic Ocean.
Segun kenni USec. Domingo, nasurok 100 a pasahero ken crew members ti nakalugan iti nasao a cruise ship a pakaibilangan iti 38 a Pilipino.
Ngem inlawlawag ti DOH official nga awan ti sakit dagiti Pilipino a crew members, segun iti World Health Organization (WHO) ken International Health Regulations.
Pad-padaanan ti ahensiya iti panagawid dagiti Pilipino a crew member, agsipudta nakasadag ti repatriation iti operator ti cruise ship.
Inlawlawag pay ni USec. Domingo, iti hantavirus ket saanen a baro ken man-manu a sakit a maala nu makontamina iti rugit wenno isbo dagiti otot a carrier ti hantavirus.
Ditoy Pilipinas, awan pay ti nailista ken nakumpirma a kaso ti hantavirus, segun kenni USec. Domingo.
Dagiti sintomas ket mala-trangkaso a sakit, kas ti panaggurigor ken panagsakit ti bag-bagi, a dandani kapada iti leptospirosis ken dengue.
Impaganetget ni USec. Domingo, nga awan ti pagdanagan ti publiko seknan iti nasao a sakit, agsipudta adayu ti lugar ken naipasidong iti quarantine ti nasao a bapor.
