Pinaregta ti Department of Health (DOH) dagiti biyahero ken dagiti makipaset iti tinawen a Visita Iglesia a siguraduen a kompleto dagiti tugotda a protective equipment ken medical supplies tapno maliklikan ti aniaman a sakit ita a Semana Santa.
Iti kaudian a pakaammo ti departamento, nainget a mabalakadan iti publiko nga agsagana iti posible nga epekto ti kinaadu ti tao ken kasasaad ti paniempo.
Kangrunaan nga irekomendar ti ahensia iti panangitugot ti umdas a danum nga inumen tapno maliklikan ti dehydration, kasta met ti payong ken personal nga agas.
Malaksid iti daytoy, impalagip pay ti DOH kadagiti umili ti panagbalon kadagiti merienda, ekstra a kawes, ken portable fans kas depensa kontra iti pangta ti nakaro a pudot iti ruar.
Naipaulog ti nasao a pakaammo tapno masigurado iti kinatalged dagiti Pilipino a manamnama nga agdudupudop kadagiti simbaan ken terminal.
Kas kanayonan a panagannad kontra kadagiti makaakar a sakit ken posible a kagat ti lamok, impaganetget ti ahensia iti kinapateg ti panagawit ti insect repellant, alcohol, ken face mask nangruna kadagiti pampubliko a lugar nga addaan ti nangato a bilang ti tattao.
Kabayatanna, tapno masigurado ti alisto a panagsungbat no adda saan a ninamnama nga insidente, impalagip manen ti DOH iti publiko dagiti emergency measures.###
