Agpalpalagip iti La Union Police Provincial Office (LUPPO) kadagiti umili ken kadagiti turista a sumarungkar ditoy probinsia.
Daytoy ket tapno maliklikan dagiti insidente ti panakalmes, kangrunaan dagiti panawen a ngumato iti bilang dagiti agdigdigos iti kabaybayan ken kadagiti karayan.
Segun kenni PLtCol. Lawrence L. Ganuelas, Public Information Officer ti La Union Police Provincial Office, agtultuloy iti nainget a panagbantayda kadagiti kabaybayan, kadua ti Philippine Coast Guard, Local Disaster Risk Reduction Offices, ken dagiti barangay tanod tapno masigurado iti kinatalged dagiti umili ken turista.
Innayon na a kas paset ti panagpatalinaed iti seguridad, agtultuloy dagiti pulis iti panangipatungpal iti buddy-buddy system, a kasapulan nga adda kadwa dagiti agdigdigos tapno adda agtultuloy a mangbantay no adda mapasamak nga emerhensia.
Saan met a baybay-an dagiti ubbing nga agdigdigos nga awan ti kaduada a nagannak wenno nataengan, ken kasapulan a masurot dagiti warning signs kasta met iti direktiba dagiti lifeguard wenno otoridad iti lugar.
Maiparit pay iti panaginom ti arak, sakbay wenno kabayatan ti panagdigos iti baybay wenno iti karayan gapu ta mabalin daytoy a mangiyeg ti disgrasya.
Impalagip ti LUPPO a napateg iti panangsurot iti pagalagadan ken panagtitinnulong ti tunggal maysa tapno masigurado ti nasayaat, natalged, ken naragsak a panagdigos kadagiti kabaybayan ken karayan ditoy probinsia ti La Union.###
