BR LA UNION – Imbabawin ti Trump administration iti Temporary Protected Status ti aganay 2,500 a Somali immigrants, ket pagdan-danagan a mapukaw metten ti legal status ken work permits dagitoy idiay Estados Unidos agingga Marso 17 agdama a tawen.
Ti nasao nga addang ket kasaruno ti nagbalin a waragawag ni President Donald Trump itay kallabes a dagiti Somali immigrants ket inawaganna a “garbage” ken kayat na a pumanaw dagitoy iti nasao a pagilian.
Maak-akusaran ngamin ti Somali community nga agisak-saknap ti fraud scandal, nga isuti rason ti pannakai-deploy ita iti ribu a federal immigration agents idiay Minneapolis area.
Kalpasan ti pannakaimuntar iti 2,000 federal agents idiay Minnesota, napaltugan ken napatay ni Immigration and Customs Enforcement (ICE) agent Jonathan Ross ti US citizen a ni Renee Good, gaputi maipagarop a pananglibas na kadagiti otoridad, maisupadi iti ibagbaga dagiti federal officials a maysa nga aggressor wenno ginandat a dangran ni Good ni agent Ross.
Idi rabii ti Lunes, Enero 13, timpuar ti laban iti baetan dagiti protesters ken federal agents iti Whipple Federal Building idiay Minneapolis.
Tallo nga indibiduwal ti naibalud ken maipagarop a nagusar dagiti federal agents ti chemicals ken flashbangs tapno ballaagan dagiti tattao a pumanaw iti kalsada ken saan da a lapdan ti trapiko.
