BR LA UNION – Nasurok a 100,000 a visa ti imbabawi ti Estados Unidos sipud nagtugaw ni U.S. President Donald Trump, segun iti U.S. State Department.
Kasaruno daytoy ti anti-migrant platform ti Trump Administration a mass deportation, ken impadamag ti Department of Homeland Security a nasurok a 605,000 a tattao ti napapanaw, ken 2.5 milyon ti boluntaryo a pimmanaw iti nasao a pagilian.
Segun iti U.S. State Department, daytoy ti kangatuan a bilang ti visa revocations iti uneg ti maysa laeng a tawen.
Sakopen ti datos iti panawen manipud ti maikadua nga inagurasyon ni Trump idi Enero 20, 2025.
Malaksid iti daytoy, rinibu pay a visa ti nakanselar gapu kadagiti krimen a pakairamanan ti assault ken drunk driving.
Agarup 8,000 nga student visas met ti inikkaten ti America.
Impaganetget ni Secretary of State Marco Rubio iti pannakausar ti McCarthy-era law tapno lapdan dagiti visa para kadagiti estudiyante a maipagarop a kayatda laeng ti makipaset kadagiti protesta kontra Israel.
Kagiddan daytoy, nainget ti panangsukimat kadagiti screening visa applications para kadagiti mangal-ala ti visa idiay Estados Unidos, kabilang iti panansukimat ti social media dagiti aplikante, kas paset ti nalawlawa a kampanya kontra immigration ti Amerika.
