BR LA UNION – Sumagmamano a nagbakwit a residente idiay Tabaco City, Albay ket agsag-sagaban iti nadumaduma a sakit gapu iti agtultuloy a panagtudo ken nalamiis a temperatura.
Segun kenni Tabaco City Health Officer Dr. Leizel Cuales Duncan iti interview ti Bombo Radyo Legazpi, awan ti rumbeng a pagdanagan ti publiko gaputa nasayaat ti pannakatarawidwid ti sitwasyon.
Maibasar iti rekord, manipud iti 1,786 nga evacuees iti siyudad, 25 laeng ti nagpakonsulta iti opisinada.
Dagiti kadawyan a sakit a nairekord ket altapresyon, panaguyek, ken panateng. Mainaig iti daytoy, imbilin ti mayor ti siyudad ti pannakaisagana ti bakuna ti trangkaso kas kanayonan a proteksiyon ti salun-at para kadagiti evacuees iti tengnga ti agtultuloy a panagalburuto ti Bulkan Mayon.
Kabayatanna, impakdaar ni Dr. Duncan nga ugalien ti agusar ti facemask gaputa posible a ma-trigger iti angkit nangruna no adda panagtinnag ti dapo ken dadduma pay nga aktibidad manipud iti bulkan.
Impasigurado pay ti opisyal a 24/7 a nakalukat dagiti clinic iti uneg ti evacuation centers tapno maipaayan a dagus ti serbisyo medikal dagiti agkasapolan.
