BR LA UNION – Rimwar iti dokumento a naidatag idiay Korte Suprema a ni sigud nga Ako Bicol partylist Rep. Zaldy Co ket adda idiay Nacka, Stockholm, Sweden idi Enero 15, 2026.
Ti ebidensya ket napaneknekan babaen ti pirma na ken pakabigbigan, a nairagpin iti petisyon na kontra kenni Ombudsman Jesus Crispin Remulla.
Kumidkiddaw ni Co ti Temporary Restraining Order (TRO) tapno lapdan iti implementasyon ti resolusyon a mangirek-rekomenda ti kaso a graft ken malversation kontra kenkuana.
Addaan ti warrant of arrest ni Co manipud Sandiganbayan seknan iti P289-milyon a flood control project idiay Naujan, Oriental Mindoro.
Segun kadagiti abogado na, pimmanaw ditoy pagilian idi Hulyo 19, 2025 para iti medical leave ngem saanen a nagsubli agingga ita gaputa maamak para ti kinatalged ti biag na.
Impaganetget pay ni Co a nalabsing iti constitutional rights na para iti due process agsipudta saan a naipaayan ti umno nga abiso tapno makapagsumite ti counter-affidavit.
Innayon na a saan nga umdas dagiti nadiskubre ti Independent Commission for Infrastructure tapno isuna ket makaswan.
Maisupadi met daytoy iti immuna a waragawag ni Interior Secretary Jonvic Remulla a ni Co ket maipagarop nga adda idiay Lisbon, Portugal.
Iti agdama, agtultuloy a maur-uray iti sungbat ti Ombudsman seknan iti kadawatan a TRO ti sigud a mammanday linteg.
