Naipasidong ti restrictive custody dagiti 22 a pulis a karaman iti hazing kadagiti agarup 100 a baro a recruits idiay Lamitan City, Basilan, segun ti Philippine National Police (PNP).
Iti pakabuklan a bilang, walo a police commissioned officers ken 14 a non-commissioned officers iti karaman kadagiti 22 a pulis.
Segun kenni PNP spokesperson Police Brigadier General Randulf Tuaño, 12 kadagitoy, agraman iti commander ti Regional Mobile Force Battalion (RMFB)-14B ti nakasuan iti panaglabsing ti Anti-Hazing Act of 2018.
Kinuna pay ni Tuaño a dagiti nakasuan ket nabigbig maibasar kadagiti nasapataan a salaylay ken medical certificates dagiti biktima.
Segun iti pannakangiwat ti PNP, iti commander ti RMFB-14B ket saan laeng nga agsungbat iti command responsibility gapu ta nakita pay iti maipagarup a pisikal a presensyana kabayatan ti insidente. Agtultuloy met iti imbestigasion dagiti otoridad iti kalawa ti partisipasion-na.
Malaksid kadagiti 22 a pulis, 55 pay nga RMFB-14B personnel iti naikkat iti puesto, isu a dimmanon ti 77 iti pakabuklan a bilang dagiti pulis a karaman iti isyu.
Inlawlawag ni Tuaño a saanna kayat a sawen nga amin a na-relieve ket adda ti direkta a partisipasionna iti hazing. Temporario a nabilin isuda nga ag-report iti regional headquarters bayat a maisaysayangkat iti imbestigasion.
Inlawlawag ni Tuaño a maysa kadagiti na-relieve iti responsable iti pannakarakurak ti viral video.
Segun ti PNP, mamati ti nasao a personnel a makatulong iti panangiruar na ti video tapno naan-anay a maisardeng iti kastoy a klase ti “welcome rites” iti hanay ti pulisya.
Kabayatanna, nabalakadan met dagiti sumagmamano kadagiti recruits a naipasidong iti medical examination nga aginana ti agingga siam nga aldaw gapu kadagiti nalak-am da a pasa ken hematoma.
Pinaglibakan met ni Tuaño dagiti reports nga adda dagiti biktima iti adda ti kritikal a kondision.
Kenunana nga awan kadagiti biktima iti kasapulan nga agtalinaed iti ospital ti nasurok maysa nga aldaw. Inlawlawagna pay a dagiti report ti pannakapukaw ti puot dagiti dadduma a recruits ket mabalin a gapuanan iti kombinasion ti pisikal a pannakabannog ken hazing.
Iti sidong ti Anti-Hazing Law, dagiti pannakadangran a nagkasapulan ti pannakaagas manipud maysa agingga iti siam nga aldaw ket madusa iti innem a tawen ken maysa nga aldaw aginggana iti walo a tawen a pannakaibalud no mapaneknekan a nagbasul.
Laksid ti pasamak, kenuna dagiti otoridad nga awan ti panggep dagiti recruits nga agkiddaw ti transfer of deployment.
Iti sidong ti zero-tolerance policy ti PNP, agpapada a sumango ti kaso nga administratibo ken kriminal dagiti mapaneknekan a karaman, kasta met iti posible a pannakaikkatda iti serbisio kas maitunos iti Republic Act 11053.###
