BR LA UNION – Inwaragawag ni Vice President Sara Duterte ita nga aldaw ti Sabado, Pebrero 21, nga idi pay napalabas a tawen a na-recruit na ti agbalin a running mate para iti 2028 presidential elections.
Ngem saan na nga inbutaktak ti nagan na tapno “maprotektaran” ti pakabigbigan daytoy.
Maipalagip nga idi Miyerkules, imbaga ni VP Sara a tumaray kas presidente inton 2028.
Inlawlawag na pay iti papel ti agbalin a vice president na ingkaso a mangabak, nga agbalin a responsable iti panang-pasungbat kadagiti agar-aramid ti biddut bayat a nakatutok isuna iti pagrebbengan kas presidente.
Kinuna na a saanna a dagus nga impaka-ammo kenni sigud a presidente Rodrigo Duterte iti nasapa a deklarasyonna.
Iti laeng asawa na a ni Atty. Manases Carpio, dagiti annak, ken sumagmamano nga staff a timmulong a nag surat iti Tagalog speech na ti maka-ammo.
Naipaka-ammo na metten iti ina na a ni Elizabeth Zimmerman iti desisyon.
Imbaga ti Bise Presidente a nagdesisyon nga ag-anunsyo ti nasap-sapa gaputa isuti ipuk-pukkaw ken kiddaw dagiti supporters na.
Dinakamat na pay ti sigud a waragawag ti ama na idi 2021 a saan a trabaho ti babai iti panagbalin a presidente.
Segun kenni VP Sara, awan pakainaigan iti kasarian ti kabaelan ti maysa a tao a mangidaulo iti pagilian.
