Binilin ni Presidente Ferdinand Marcos Jr. iti Department of Foreign Affairs (DFA) ken Department of Migrant Workers (DMW) nga ipatungpal amin nga contingency plans tapno masigurado iti kinatalged dagiti Pilipino idiay Middle East, kasaruno dagiti reports ti airtrikes idiay Iran.
Iti maysa nga opisyal a waragawag, impaganetget ti President a “paramount” wenno kapatgan iti seguridad dagiti kailian iti rehion.
Segun kenni DFA Secretary Maria Theresa Lazaro, naka-“full alert” dagiti embahada ti Pilipinas idiay Tehran ken Tel Aviv, karaman dagiti pagilian idiay Gulf Cooperation Council (GCC) nga addaan ti ado nga Overseas Filipino Workers (OFWs).
Pinasingkedan ti ahensia nga iti agdama ket awan pay ti naipadamag a Pilipino a nasaktan wenno direkta a naapektaran dagiti panagbettak.
Nainget iti palagip ti gobierno kadagiti Pilipino nga adda iti lugar nga agtalinaed iti uneg ti pagtaenganda ken liklikan dagiti pampubliko a lugar bayat a nabara pay laeng iti sitwasion.
Nakipamaysa met iti Pilipinas iti panawagan ti United Nations para iti dagos a dayalogo ken negosasion tapno malappedan iti nakarkaro a tension iti nagbaetan ti Israel, America, ken Iran.###
