BR LA UNION – Naipangato ti red “flag of revenge” iti rabaw ti dome ti Jamkaran Mosque idiay Qom, Iran, kas simbolo ti pungtot ken tarigagay a hustisiya ti pagilian kalpasan ti pannakatay ti Supreme Leader a ni Ayatollah Ali Khamenei.
Maipalagip a napatay ni Khamenei idi Sabado, iti inyuswat a joint airstrike operations ti Israel ken Estados Unidos idiay Tehran.
Kinumpirma ti Iranian state media ti pannakatay na idi kalman, Domingo, a nangparnuay ti protesta ken panagladingit ti Iran ken iti dadduma a pagilian.
Nagduma iti reaksyon ti sumagmamano a lider iti west iti panangawag ni U.S. President Donald Trump kenni Khamenei a maysa kadagiti pinaka-evil wenno kadaksan a tao iti pakasaritaan ken imbaga na pay a ti pannakatay na ket gundaway para kadagiti Iranian a mang-subbot ti pagilian da.
Kabayatanna, inallokoy ni Israeli Prime Minister Benjamin Netanyahu dagiti Iranian nga agkaykaysa kontra iti rehimen.
Iti sabali a bangir, mangngegan ti napigsa a palakpak ken riyaw iti kalsada dagiti dadduma nga Iranians idi maamwan da iti report a natayen ni Khamenei.
Dinadael da PAY ti Khomeini monument kalpasan a naipadamag a natay iti airstrike ti Supreme Leader, a nagtakem ti 36 a tawen.
Segun iti Israeli Defense Forces (IDF), ni Khamenei ti utek kadagiti operasyon kontra Israel ken inawaganna nga isuna ti ”head of the Iranian octopus,” nga addaan ti maipagarop a dakkel nga impluwensya idiay Middle East.
Indeklara ti Iran ti 40 days a national mourning ken nangrugin ti panang-obserbar ti public funeral kadagiti kangrunaan a siyudad.
Idi kalman, Domingo, binilin ni Alireza Arafi, 66 anyos a cleric ken miyembro ti Guardian Council, kas jurist member ti konseho.
Kadwa na iti liderato da President Masoud Pezeshkian ken Chief Justice Gholamhossein Mohseni Ejei tapno masalakniban ti panagtakem ti supreme leader bayat a maur-uray ti permanente a kasukat na, segun iti Iranian state media.
