Inkari iti gobierno ti Israel nga ipaayanda ti tungpal biag a suporta para iti nabati a pamilia ti Filipino caregiver a ni Mary Ann Velasquez De Vera a pimmusay gapu ti missile attack ti Iran idiay Tel Aviv.
Daytoy iti pinasingkedan ni Israel Ambassador to the Philippines a ni Dana Kursh, nga emosional a nangidanon ti pannakipagriknana iti pamilia ti biktima ken impasigurado nga iti sidong ti linteg ti Israel, iti pamilia dagiti nasugatan wenno natay iti tengnga ti armado a rinnupak, Israeli man wenno ganggannaet, ket maikari iti tungpal biag a benepisio.
Maipalagip a natay ni De Vera iti retaliatory strike ti Iran kalpasan iti panangraut ti Israel ken Estados Unidos iti nasao a pagilian a nakatayanen dagiti ginasut a tattao.
Innayon ti Israeli Ambassador nga iti national security agency ti Israel iti mangimaton ti pannakairuar ti benepisio, ken personalna a pasungadan iti bangkay ti biktima inton makasangpetda ditoy Pilipinas.
Iti agdama, awan pay ti kumpirmado a petsa iti repatriation ti bangkay ti pimmusay a Filipina caregiver, gapu ta agtaltalinaed a nakaserra dagiti dadduma nga airspace ken kanselado dagiti flights iti kangitingitan ti agtultuloy a tension idiay Middle East.###
