Inlawlawag ni Cornerlia Rillera, Acting Regional Director IV ti Civil Service Commission Region I, dagiti Awards a maipaay kadagiti outstanding government officials, employees wenno groupo.
Iti exclusive interview ti Bombo Radyo, inlawlawag na nga adda ti Yearly Search for Outstanding Public Officials and Employees, sinukatan ti Civil Service Commission iti programa a Gawad Lingkod Bayani, a mangparang-ay iti panangbigbig kadagiti naisangsangayan nga opisyal ken empleyado ti gobyerno nga agserbi iti publiko.
Adda ti tallo a kategoria ti pammadayaw iti nasao a programa.
Umuna, ti Gawad Lingkod Bayani ng Pangulo, nga isu ti kangatuan a pammadayaw a maited kadagiti opisyal wenno grupo dagiti empleyado ti gobyerno a nangipakita iti naidumduma a serbisyo ken dakkel a kontribusion iti public service.
Maikadua, ti Gawad Dangal ng Bayan Award, a maited kadagiti empleyado ti gobyerno a nangipakita iti ehemplo a panagbiag ken panagserbi kas maibasar iti Republic Act No. 6713. Karaman ditoy iti panangipakita ti professionalism, panagregget nga agserbi iti interes ti publiko ken kinapudno iti trabaho.
Maikatlo, ti Gawad Pag-asa ng Bayan Award, a maysa a performance-based award a kas iti kriteriya ti Gawad Lingkod Bayani. Ngem ti epektoda ket kadawyan a makita iti lebel ti komunidad wenno iti dua wenno ad-adu pay nga ahensiya ti gobyerno, a mangipakita iti positibo nga epekto iti serbisyo-publiko.
Babaen kadagitoy a pammadayaw, namnamaen ti Civil Service Commission a mapabileg pay iti integridad, dedikasyon, ken professional dagiti empleyado ti gobierno iti panagserbi kadagiti umili.
Uray asino iti mangnominar iti maysa nga indibidwal wenno grupo dagiti opisyal ken empleyado ti gobyerno para iti Gawad Lingkod Bayani nga programa ti Civil Service Commission. Mabalin nga isumite ti nominasyon para kadagiti government officials, empleyado, wenno uray pay dagiti opisyal ti barangay kas dagiti barangay captain.
Segun ti CSC, dagiti requirements ken proseso ti nominasyon ket mabalin a ma-download iti official website ti Civil Service Commission tapno masurot dagiti umno nga pagalagadan iti panagpili.
Iti agdama, aktibo nga itantandudo ti CSC iti panangipasa dagiti nominasyon para ti 2026 Gawad Lingkod Bayani ginggana Marso 31.
Idi 2025, dumanon ti 29 a nominasyon iti naawat ti entero a rehiyon. Kalpasan iti panagsukimat ti Committee on Awards, nagresulta daytoy ti 18 regional winners. Dagiti napili a regional winners ket naipasa iti National Secretariat para iti maudi a panagammiris iti national level.
Manipud kadagiti naipasa a nominasyon, nagbalin a tallo ti semi-finalists, aginggana dua iti napili a national winners manipud iti probinsya a La Union.
Iti kategoria ti Gawad Dangal ng Bayan, napadayawan ni Dr. Celia Lubiano a nagserbi iti Ilocos Training and Regional Medical Center bayat nga iti Gawad Lingkod Bayani ng Pangulo ken naipaima kenni Mayor Divine Fontanilla ti Bacnotan LGU.
Dagitoy a pammadayaw ket maibilang kas kangatuan a panangbigbig a mabalin nga ipaay kadagiti public servants nga agtultuloy a mangipakita ti kinapudno, dedikasion, ken naidumduma a panagserbi para iti publiko.
Iti sabali a bangir, inlawlawag ti opisial iti nagdumaan ti Sub-Professional ken Professional eligibility.
Iti exclusive interview ti Bombo Radyo kenkuana, inlawlawag na nga iti Sub-Professional exam ket nalaklaka gapu ta simple dagiti tests ken ababa iti oras ti eksaminasion.
Kabaliktaran daytoy iti Professional exam a narigrigat ken nabayag iti oras a maitukon kadagiti examinee.
Malaksid iti eksamin ket nagduma dagiti nasao nga eligibility iti panagaplikar. Ti Sub-Professional eligibility ket mausar laeng kadagiti first level positions iti gobyerno, karaman dagiti clerical wenno lower level a trabaho kas iti administrative aide ken administrative assistant.
Bayat nga iti CSC Professional eligibility ket mausar met kadagiti second level positions, pakairamanan dagiti professional ken technical a trabaho iti nagduduma nga ahensia ti gobyerno.
Nupay kasta, impaganetget ni Rillera a saan a karaman ditoy dagiti posision a kasapulan ti lisensya wenno panagpraktis ti propesion kas iti accountant, nurse, ken dadduma pay a license professionals.
Babaen ti professional eligibility, mabalin nga aplikaran ti Administrative Officer I aginggana Chief level, dagiti specialist ken analyst positions kadagiti nadumaduma nga ahensia ti gobierno.
Imbaga na pay nga uray iti local government units, mabalin a mausar ti CSC Professional eligibility agingga iti lebel ti department head no lakitdi saan a kasapulan ti practice of profession.
Kabayatanna, napateg nga ammo no ania iti nagdumaan ti Sub-Professional ken Professional tapno adda ti basaran sakbay nga agexam.###
