Limmagpasen ti presyo ti krudo iti $100 ti tunggal bariles iti umuna a gundaway kadagiti napalabas a nasurok tallo-kagudwa a tawen. Daitoy ket iti kangitingitan ti epekto ti agtultuloy a gyera idiay Iran a makaap-apektar iti produksyon ken panangiruar ti langis idiay Middle East.
Ti presyo itan ti maysa bariles ti Brent crude a maus-usar kas international standard ket dumanonen iti $107.97, kasaruno ti panagtultuloy ti market trading sadiay Chicago Mercantile Exchange. Ngimmato daitoy ti 16.5% manipud pay idi Biernes, a nagserra ti presyo ti $92.69. Manmanma a ngumato wenno bumaba pay ti presyo kabayatan ti panagtultuloy ti market trading.
Maipalagip a maudi a nakailista ti nasurok $100 ti kada bariles a presyo ti krudo ti Estados Unidos idi pay Hunyo 30, 2022. Dayta a panawen ket dimmanon daitoy ti $105.76 bayat a ti Brent crude met ket ngimmato idi Hulyo 29, 2022 iti $104 ti kada bariles.
Manipud idi nangiyuswat ti joint attack ti Israel ken Estados Unidos kontra Iran ket inapektaranen ti presyo ti langis dagiti financial markets.
Gapo kadaitoy ket napartuat ti danag a lalo pay a ngumato ti implasyon gapo iti nangatngato nga energy costs ken mabalin pay nga agtungpal iti nababa a panaggastar manipud kadagiti Amerikano a kangrunaan nga agpatpataray ti ekonomiya.
