BR LA UNION – Imbilin ni Presidente Ferdinand Marcos, Jr. ti dagus a pannakaiwaras ti PHP 5,000 fuel subsidy para kadagiti pampubliko a driver a naapektaran iti panagngato ti presyo ti gasolina gapu iti agtultuloy a tensiyon ken gubat idiay Middle East.
Tapno mapapartak ti implementasyon, tinaripnong ni Executive Secretary Ralph G. Recto dagiti Metro Manila mayors ita nga aldaw tapno maplantsa ti napardas ken naannayas a pannakaiwaras ti nasao a tulong.
Impaganetget ni Recto a napateg ti panagtitinnulong, nangruna a dagiti mayor iti kangrunaan a maka-ammo ti pudno a kasasaad ken bilang dagiti tricyle ken jeepney drivers iti masakopan da a siyudad.
Kinuna ni Recto a kayat ti Presidente a maidanon a dagus ti tulong iti tunggal driver nga agkasapulan.
Mangrugi ti panagibunong ti fuel subsidy inton sumaruno a lawas idiay Metro Manila, nga idauluan ti Department of Social Welfare and Development (DSWD) ken Department of Transportation (DOTr).
Dagus met a maipatungpal ti pannakaiwaras kadagiti dadduma a rehiyon iti intero a pagilian.
Paset daytoy ti nalawag a direktiba ti Presidente a mangipaay iti dagus a tulong ken proteksiyon iti pagbiagan dagiti sektor a direkta a naapektaran iti krisis ti lana.
Agtinnulong dagiti ahensya ti national government ken LGUs tapno masiguro ti napartak, naurnos, ken direkta a makadanon ti tulong kadgaiti drivers nga agkasapolan.
