Inlunglungalong ni Parañaque 2nd District Representative Brian Raymund Yamsuan a maipaayan ti ₱7K a binulan a subsidiya dagiti kwalipikado a benepisyaryo para ti sektor dagiti mangngalap, mannalon, ken mangmangged ti pampubliko a transportasyon.
Nakapauneg iti House Bill No. 8340 iti pannakaipatungpal ti komprehensibo a fuel subsidy program ti sektor ti pampubliko a transportasyon, agrikultura, ken panagkalap a permi nga apektado ti panagngato iti presyo ti langis.
Inlawlawag ni Yamsuan a panggep ti gakat a ma-institutionalize ti fuel subsidy program tapno masiguro nga addaan iti nakalatag a mekanismo ti gobierno dagiti vulnerable sectors tunggal krisis.
Mabukel pay ti maysa nga Advisory Council a mangimaton ti panagtingiting ken panangituding ti gatad ti subsidiya, depende iti sitwasyon wenno gatad dagiti produkto.
Apaman naan-anay nga agbalin a linteg, ti alokasyon para iti programa ket mairamanen iti tinawen a pondo babaen ti Department of Energy (DOE), Department of Transportation(DOTR), Department of Agriculture 9DA), ken Department of Social Welfare and Development (DSWD).
