BR LA UNION – Pormal a kinaswan ti La Union Police iti lalaki a karaman iti trending video a nanglibas ken naki-kinnamat kadagiti pulis, manipud Bauang agingga idiay Agoo, La Union kalpasan a mairaman iti aksidente ti lugan idi Sabado, Marso 14, 2026 idiay Barangay Quinavite, Bauang, La Union.
Maipalagip a nadungpar ti 45-anyos a lalaki, managan Ray Joseph Viscarra de Castro, awanan asawa, residente ti Barangay Ligas, Bacoor City, Cavite, a nagmaneho ti puraw nga SUV iti sar-sarunwenna a kotse a minaneho ti maysa a kameng ti Philippine Coastguard, residente ditoy siyudad ti San Fernando.
Nagresponde ti Bauang Police Station iti nasao a vehicular accident ket naimbitaran dagiti dua a driver iti police station.
Imbes a sumurot iti linteg ni de Castro, maipagarop a pinataray na ti man-manehuenna a kotse, a nagturong iti abagatan a direksiyon.
Kinamat dagiti otoridad ti suspek ken naki-koordinar da iti dadduma a police station partikular idiay Agoo.
Sakbay a natiliw ti suspek ken nakorner idiay Barangay San Marcos ili nga Agoo, agpar-parang a nakadungpar pay daytoy ti sumagmamano a behikulo agraman ti patrol car ti Bauang Police Station.
Pinaltugan pay ti pulis iti akin-sango a pilid ti kotse ti suspek tapno mapagsardeng ngem maipagarop nga intuloy na latta ti agpataray.
Nagpatingga ti panangkamat idiay Brgy. San Marcos, Agoo ken naballigi a na-flag down ken inarestoda ti suspek.
Awan ti naipadamag a nadangran iti insidente, malaksid ti pannakadadael dagiti lugan a karaman iti aksidente ken saan pay ammo ti pakabuklan a damages.
Maibasar iti report, inturong dagiti otoridad ti suspek idiay Caba District Hospital ngem maipagarop a nagkedked nga agpaisidong iti medical examination ken alcohol breath test.
Ti suspek ket naidatagan ti kaso a reckless imprudence resulting in damage to property, disobedience to a person in authority, ken direct assault.
