BR LA UNION – Inpaganetget ni Melencio “Boy” Vargas, national president ti Alliance of Transport Operators and Drivers Association of the Philippines (ALTODAP), a saanen nga umanay iti panangikkat ti excise tax iti langis, gaputa nalabes unayen ti ngimmatuan ti presyo dagiti produkto a petrolyo.
Kinuna na, nadagsen iti ibak-baklay ita dagiti driver gaputi nagsasaruno a mega oil price hike nga impatungpal dagiti kumpanya ti langis ditoy pagilian.
Idiay Metro Manila, umaboten iti nasurok P100 kada litro iti presyo dagiti produkto a petrolyo.
Iti diesel ken kerosene ket nakailista ti double-digit increases gapu iti agtultuloy a riribok idiay Middle East a naka-apektar iti supply routes.
Iti sangalubongan a merkado, agtaltalinaed a nangato iti presyo ti langis, banag a maipaspasa met iti lokal a level.
Idi Marso 30, 2026, ti Brent crude oil benchmark ket lalo pay a ngimmatu, kasaruno ti panagngato iti naglabas a lawas.
Makuna a dagiti driver ti dyip ken bus iti kangrunaan nga apektado, agsipudta saanen nga umanay iti agdama a plete tapno masungbatan iti nangina a gastos iti krudo.
