BR LA UNION – Dinayyeg ti magnitude 5.9 a gingined iti Sarangani Island idiay Davao Occidental itay alas-6:34 ti rabii, aldaw ti Sabado, Abril 4.
Maibasar iti report ti PHIVOLCS, narikna ti panagdayyeg iti naduma-duma a lugar idiay Mindanao, ken nailista ti Intensity III idiay siyudad ti General Santos.
Iti Instrumental Intensities wenno nailista a kapigsa ti gingined maibasar iti instrumento, nailista ti Intensity III idiay ili ti Malungon idiay Sarangani.
Kabayatanna, Intensity II idiay M’lang idiay Cotabato, Digos City idiay Davao del Sur, Jose Abad Santos idiay Davao Occidental, ken ili ti Malapatan ken Kiamba idiay Sarangani.
Narikna pay ti kapada a kapigsa ti panagdayyeg idiay T’boli, Santo Niño, ken Tupi idiay South Cotabato, Palimbang idiay Sultan Kudarat, ken General Santos City.
Intensity I iti dadduma a paset ti Bukidnon, Cotabato, Davao del Sur, Davao Occidental, Davao de Oro, Misamis Oriental, Sarangani, South Cotabato, Zamboanga City, ken Davao City.
Iti agdama, awan ti nailista a dakkel a perdisyon wenno natay iti panagdayyeg.
Nupay kasta, naiballaag a posible iti aftershock, isunga nabalakadan ti publiko nga agtalinaed nga alerto ken suruten iti abiso dagiti toridad.
