Kinontra ni Marikina 2nd District Representative ken chairperson ti House Committee on Ways and Means Miro Quimbo ti singasing nga ikkaten ti Value-Added Tax (VAT) ti langis nu kasta ket mapababa ti presyo ti petrolyo, laksid ti panawagan para ti madagdagos a bang-ar gapo iti krisis.
Indepensa na a makaapekto ti addang, saan laeng para ti biruk ti gobierno nu ketdi agraman ti credit rating ti Pilipinas, a napateg iti panangituding ti interest rates kadagiti utang ti pagilian.
Maipalagip nga inaprobaran ti Kongreso ti singasing a mangipapaay-bileg para ti Presidente a suspendiren ti wenno kissayan ti excise tax kadagiti produkto a petrolyo kas sungbat iti agdama a sanglubongan a karit.
